Ավտովարկի կամ լիզինգի համար դիմելը բազմաբաղադրիչ գործընթաց է, որը կարող է անհաղթահարելի թվալ, հատկապես նրանց համար, ովքեր մեքենաների շուկայում քիչ փորձ ունեն։ Դիմելիս պետք է մի քանի դրույթ հաշվի առնել՝ սկսած Ձեր ընթացիկ ֆինանսական դրությունից մինչև վարկի կամ լիզինգի տեսակը, որը փնտրում եք, և մեքենան, որը ցանկանում եք ձեռք բերել։ 

Հուսալիություն

Մեքենա գնելիս պետք է համոզվել, որ այն վստահելի է։ Այսինքն՝ Դուք պետք է ուսումնասիրեք տարբեր ապրանքանիշեր՝ պարզելու համար, թե որ մեկն է արտադրում իրապես հուսալի և քիչ խնդիրներ ունեցող փոխադրամիջոց։ Անպայման կարդացեք հաճախորդների կարծիքները, քանի որ դրանք կարող են օգնել Ձեզ ճիշտ պատկերացում կազմել մեքենայի որակի և հուսալիության մասին։ 

Հատկանիշներ

Մտածեք, թե մեքենայի որ հատկանիշներն են Ձեզ համար էական։ Դուք փնտրում եք վերջին թարմացումներով ճոխ մեքենա՞, թե՞ կբավարարվեք ավելի համեստ տարբերակով։ Գուցե Դուք փնտրում եք ոսկե միջի՞նը։ Այստեղ հիշենք մեքենայի գնի մասին․ որոշ առանձնահատկությունների շնորհիվ մեքենայի գինը բարձրանում է, և շատ կարևոր է այդ ամենը հաշվի առնել, եթե Ձեր բյուջեն սահմանափակ է։ 

Վառելիքի ծախս

Վառելիքի արդյունավետ օգտագործումը կարևոր գործոն է մեքենա ընտրելիս։ Արժե հաշվի առնել ակնկալվող կիլոմետրաժը և վառելիքի միջին ծախսը, որպեսզի առավելագույնս ճիշտ ընտրեք Ձեր կարիքներին համապատասխանող մեքենա։ Որոշ փոխադրամիջոցներ ավելի խնայող են, քան մյուսները, ուստի մեքենա գնելու որոշումը կայացնելիս հաշվի առեք վառելիքի ծախսը։ 

Ապահովություն

Մեքենա գնելիս մարդու մտքին առաջինը գալիս է ապահովությունը։ Ուսումնասիրեք Ձեր նախընտրած մեքենայի անվտանգության աստիճանը և համեմատեք այլ մեքենաների հետ։ Ապահովության աստիճանն իմանալը կարող է մեքենա գնելու հարցում որոշիչ դեր խաղալ։ 

Թեստ դրայվ

Մինչև գնելը կարևոր է մեքենան փորձարկել։ Վարեք մեքենան և ստուգեք անվտանգության համակարգը, ձիաուժերը, արագացումը, ինչպես նաև խցիկի ձայները։ Միացրեք օդորակիչը և համոզվեք, որ օդափոխությունն անխափան աշխատում է։ Ուշադրություն դարձրեք ներքին հարդարմանը՝ համոզվելու համար, որ մեքենան հարմարավետ է և ունի լավ կահավորում։ Թեստ դրայվը կօգնի Ձեզ հասկանալ՝ արդյոք մեքենան լավ վիճակում է և արդյոք համապատասխանում է Ձեր կենսակերպին։

Բյուջե

Մեքենա ընտրելիս կարևոր է ուշադրություն դարձնել բյուջեին։ Ձեր բյուջեին լավ տիրապետելը կնեղացնի պոտենցիալ մեքենաների շրջանակը և կօգնի Ձեզ ընտրել Ձեր դրամապանակին համապատասխանող լավագույն մեքենան։ Բացի դրանից, կախված ամենանպաստավոր տարբերակից՝ պետք է որոշեք՝ արդյոք կանխիկ գնում եք անելու, թե փոխառելու եք։ Շատ մարդիկ փոխառում են վարկի կամ լիզինգի միջոցով։ Ուսումնասիրեք վճարման եղանակները, որպեսզի հասկանաք՝ որն է Ձեզ ամենահարմարը։

Օգտագործում

Սա շատ կարևոր գործոն է, որը պարտադիր պետք է հաշվի առնել։ Եթե Դուք վարում եք ամեն օր և նախատեսում եք մեքենան պահել մի քանի տարի, ավտովարկը կարող է լավ տարբերակ լինել Ձեզ համար։ Մյուս կողմից, եթե նախընտրում եք ամենաարդի հնարավորություններով մեքենաները և նախատեսում եք մեքենան վարել միայն ժամանակ առ ժամանակ, լիզինգն ավելի հարմար տարբերակ է։

Վարկային սքոր

Մինչև ավտովարկի համար դիմելը կարևոր է վարկային սքորը ստուգելը։ Ձեր վարկային սքորն իմանալը կօգնի ավելի լավ պատկերացում կազմել Ձեզ առաջարկվող տոկոսադրույքի մասին և հասկանալ՝ արդյոք Ձեզ կարող են վարկ տրամադրել, թե ոչ։ Ինչքան բարձր է վարկային սքորը, այնքան ավելի հավանական է, որ Ձեր վարկը կհաստատեն, և Դուք ավելի լավ տոկոսադրույքով վարկ կստանաք։

Տոկոսադրույք

Լավագույն տոկոսադրույքով գնում անելը կարող է օգնել Ձեզ վարկի ողջ ժամկետի ընթացքում խնայել մեծ գումար։ Տարբեր վարկատուներ ունեն տարբեր տոկոսադրույքներ, ուստի նախքան որոշում կայացնելը կարևոր է առաջարկները համեմատելը և իրար հակադրելը: Բացի դրանից, ավելի երկար ժամկետով վարկ ընտրելը սովորաբար հանգեցնում է ամսական ավելի փոքր չափով վճարումների, բայց այդ դեպքում վարկի ընդհանուր չափն ավելի բարձր կլինի:

Կանխավճար

Ավտովարկ տրամադրելիս շատ վարկատուներ պահանջում են առնվազն փոքր կանխավճար։ Ընդհանուր առմամբ որքան շատ կանխավճար տաք, այնքան ավելի լավ գործարք կկնքեք։ Կանխավճարն օգնում է նաև ստանալ ավելի լավ վարկային պայմաններ և նույնիսկ կարող է նվազեցնել պահանջվող տոկոսադրույքը և/կամ ամսական վճարման չափը։ 

Ընդհանուր արժեքը

Անպայման հաշվեք ավտովարկի ընդհանուր արժեքը՝ մեքենայի արժեքից բացի ներառելով գրանցման, ապահովագրության և վերանորոգման ծախսերը։ Փոքրիկ ուսումնասիրություն կատարելը կարող է օգնել Ձեզ ավելի ճշգրիտ բյուջե կազմել և համոզվել, որ իսկապես արժե դիմել ավտովարկի օգնությանը։

ՈՒՇԱԴՐՈՒԹՅՈՒՆ Ֆինանսական գրագիտության գործիքով տրամադրված տեղեկությունը կրում է միայն տեղեկատվական նպատակ։ Օգտատերը միշտ պետք է անցկացնի սեփական հետազոտություն և խորհրդակցի մասնագետի հետ՝ համոզվելու համար, որ գործիքի միջոցով ստացված խորհուրդները կիրառելի են իր կարգավիճակի համար։ Մենք չենք երաշխավորում այս կայքում ներկայացված կամ կայքի միջոցով տարածված որևէ խորհրդի, կարծիքի, հայտարարության կամ այլ տեղեկության լրիվ ճշգրտությունը, ամբողջականությունը և վստահելիությունը, ուստի տրամադրված տեղեկության վրա հիմնվելիս գործեք բացառապես սեփական ռիսկով։