Երբ հարցը վերաբերում է բյուջետավորմանը, գնաճը կարող է լուրջ մարտահրավեր լինել։ Գնաճը գների բարձրացումն է, և սա նշանակում է, որ ժամանակի ընթացքում որոշակի գումարով մարդիկ սկսում են գնել ավելի քիչ ապրանքներ և ծառայություններ։ Գնաճը կարող է դժվարացնել ֆինանսների կառավարումը և խանգարել Ձեզ վերահսկել բյուջեն։ Այնուամենայնիվ, մի քանի պարզ հնարքներով Դուք կարող եք նվազեցնել գնաճի ազդեցությունը բյուջեի վրա։ 

Գնաճը ժամանակի ընթացքում ապրանքների և ծառայությունների արժեքների աճի ցուցիչն է: Գնաճի հետ մեկտեղ գումարի գնողունակությունը նվազում է։ Սա նշանակում է, որ նույն չափի գումարն ավելի քիչ արժեք ունի, քան նախկինում։ Գնաճը կարող է պայմանավորված լինել տարբեր գործոններով, ներառյալ առաջարկի և պահանջարկի փոփոխությունները, տնտեսական աճը, աշխարհաքաղաքական իրավիճակը և կառավարության քաղաքականությունը:

Անձնական ֆինանսների վրա գնաճի ամենաուղղակի ազդեցությունը փողի արժեզրկումն է։ Սա նշանակում է, որ նույն ապրանքներն ու ծառայությունները գնելու համար հիմա ավելի շատ գումար է պահանջվում: Օրինակ, եթե գնաճը կազմում է 5%, ապա մեկ տարի առաջ գնված 100 եվրո արժողությամբ ապրանքը այժմ կարժենա 105 եվրո: Նույն կենսակերպը վարելու համար Դուք ստիպված եք ավելի շատ գումար ծախսել:

Գնաճ կանխատեսելը դժվար է, ուստի կարևոր է տեղյակ լինել հնարավոր հետևանքներից, որոնք կարող են առաջանալ Ձեր անձնական ֆինանսների համար: Գնաճի հետևանքներից պաշտպանվելու լավագույն միջոցը խելամտորեն խնայելն ու ներդնելն է: Բաժնետոմսերում և պարտատոմսերում ներդնելը, ինչպես նաև այլ ներդրումները, որոնք ավելի քիչ են տուժում գնաճից, կարող են օգնել փոխհատուցել փողի արժեզրկման հետևանքով առաջացած կորուստները: Բացի դրանից, հնարավոր գնաճը նախատեսող ֆինանսական պլան ունենալը կարող է օգնել Ձեզ շարունակել վարել նույն կենսակերպը:

Պարբերաբար վերանայեք Ձեր բյուջեն և սահմանեք ծախսերի շեմ

Ձեր ծախսերին հետևելը և բյուջեն պարբերաբար թարմացնելը կարող են օգնել Ձեզ խուսափել գնաճի ծանր հետևանքներից։ Այս հնարքները թույլ կտան բյուջեն համապատասխանեցնել գների աճին, և Դուք վստահ կլինեք, որ ավել չեք ծախսում։

Կրճատեք ոչ անհրաժեշտ ծախսերը

Գնաճի հետևանքները մեղմելու լավագույն տարբերակներից մեկը ոչ անհրաժեշտ ծախսերի կրճատումն է։ Այդպիսի ծախսերից են դրսում ուտելը, նոր հագուստ գնելը և կինոթատրոն գնալը։ Նման ծախսերի կրճատումը կարող է խնայել Ձեզ համար բավականաչափ գումար գնաճի հետևանքներից խուսափելու համար։

Համեմատեք գները

Տարբեր առաջարկներ համեմատելով՝ կարող եք խնայել գումար․ տարբեր խանութներում կարող եք համեմատել նույն ապրանքի գները և օգտվել ավելի մատչելի առաջարկներից։ Շատ խանութներ առաջարկում են ապրանքը վաճառել ամենացածր գնով, եթե այլ տեղ նույն ապրանքն ավելի մատչելի գտնեք, ուստի անպայման օգտվեք նման առաջարկներից։ 

Մարեք պարտքը

Պարտքի մարումը կարող է օգնել Ձեզ նվազեցնել գնաճի ազդեցությունը բյուջեի վրա: Գների բարձրացման հետ մեկտեղ պարտքի մարումը կարող է դժվարանալ, ուստի այն հնարավորինս արագ մարելը կօգնի վերահսկել Ձեր ֆինանսները:

Խնայեք արտակարգ իրավիճակների համար

Գնաճը կարող է դժվարացնել խնայելը, ուստի կարևոր է անսպասելի ծախսերի համար գումար առանձնացնել։ Արտակարգ իրավիճակների համար բյուջե ունենալը կարող է օգնել Ձեզ ֆինանսական ծանր ժամանակաշրջանում խուսափել պարտք վերցնելուց։

Ներդրեք բաժնետոմսերում և պարտատոմսերում

Բաժնետոմսերում և պարտատոմսերում ներդրումներ կատարելը կօգնի Ձեզ պաշտպանվել գնաճի հետևանքներից: Գների աճի հետ մեկտեղ Ձեր ներդրումները կարող են օգնել բարելավել Ձեր ֆինանսական դրությունը՝ ապահովելով ավելի բարձր եկամուտներ: Ներդրեք գնաճից պաշտպանված շուկաներում, ինչպիսիք են պարտատոմսերը, պետական արժեթղթերը և անշարժ գույքը: Նման ներդրումները կարող են պաշտպանել Ձեր գումարը գնաճի հետևանքներից և ապահովել եկամտի կայուն հոսք:

ՈՒՇԱԴՐՈՒԹՅՈՒՆ Ֆինանսական գրագիտության գործիքով տրամադրված տեղեկությունը կրում է միայն տեղեկատվական նպատակ։ Օգտատերը միշտ պետք է անցկացնի սեփական հետազոտություն և խորհրդակցի մասնագետի հետ՝ համոզվելու համար, որ գործիքի միջոցով ստացված խորհուրդները կիրառելի են իր կարգավիճակի համար։ Մենք չենք երաշխավորում այս կայքում ներկայացված կամ կայքի միջոցով տարածված որևէ խորհրդի, կարծիքի, հայտարարության կամ այլ տեղեկության լրիվ ճշգրտությունը, ամբողջականությունը և վստահելիությունը, ուստի տրամադրված տեղեկության վրա հիմնվելիս գործեք բացառապես սեփական ռիսկով։