Ավել գումար հավաքելը հաճախ բարդ է, մանավանդ, եթե Դուք ապրում եք սահմանափակ բյուջեով։ Մեծ գնում անելու համար խնայելու նպատակ դնելը հիանալի մոտիվատոր է։ Անկախ նրանից՝ խնայում եք մեքենայի, արձակուրդ գնալու, նոր խոհանոցի, թե այլ մեծ գնման համար, կան մի քանի հեշտ քայլեր, որոնք կօգնեն Ձեզ հասնել Ձեր նպատակին։

Նպատակ դրեք

Խնայելու առաջին քայլը իրագործելի նպատակ դնելն է։ Դուք պետք է ինքներդ Ձեզ համար սահմանեք, թե կոնկրետ ինչ եք ուզում գնել, որպեսզի հասկանաք՝ ինչքան գումար պետք է խնայեք։ Ապա սահմանեք Ձեր նպատակին հասնելու ժամկետը․ սա կօգնի չշեղվել նպատակից և մնալ մոտիվացված։ 

Հետևեք ծախսերին

Նպատակ դնելուց հետո շատ կարևոր է ծախսերին հետևելը։ Ուսումնասիրեք վճարային կտրոնները, վերանայեք ծախսերը և պարզեք՝ ինչի վրա կարող եք գումար խնայել։ Ի՞նչը կարող եք բացառել ծախսերից․ օրինակ՝ առաքումով սնունդ պատվիրելը, թանկ սուրճը, ծխախոտն ու տարբեր բաժանորդագրությունները։ Այդպիսով Դուք կկարողանաք գումար առանձնացնել Ձեր նպատակին հասնելու համար։ 

Կազմեք բյուջե

Ձեր բոլոր ծախսերի համար առանձին բյուջե պատրաստեք։ Այդպես Դուք ավելի լավ կհասկանաք՝ որքան գումար կարող եք իրատեսորեն հատկացնել Ձեր նպատակին հասնելու համար։ 

Ավտոմատացրեք Ձեր խնայողությունները

Եթե փորձում եք գումար խնայել, ավելի հեշտ կլինի թողնել այն ինքնակառավարման ռեժիմի վրա։ Ամեն ամիս կամ, որքան հնարավոր է, հաճախ կատարեք ավտոմատ փոխանցումներ Ձեր ընթացիկ հաշվից դեպի խնայողական հաշիվ։ Որոշ բանկեր նույնիսկ առաջարկում են ավտոմատացված խնայողությունների ծրագրեր, որոնք կարող են հեշտացնել գործընթացը։ Չմոռանաք ընտրել առանց վճարների և առանց նվազագույն մնացորդի խնայողական հաշիվ։

Փնտրեք եկամուտը մեծացնելու ուղիներ

Մեծ գնման համար խնայելը պահանջում է նվիրվածություն և որոշակի զոհաբերություններ։ Գործընթացը հեշտացնելու համար փորձեք հավելյալ գումար աշխատելու ձև գտնել։ Հավելյալ եկամտի համար կարող եք փնտրել կես դրույքով աշխատանք կամ աշխատել լրացուցիչ պրոյեկտների վրա։ Եկամուտը մեծացնելու համար Դուք նույնիսկ կարող եք վաճառել այն իրերը, որոնք այլևս չեք օգտագործում։ 

Խուսափեք իմպուլսիվ գնումներից

Չնայած գայթակղության ուժին, հիշեք, որ յուրաքանչյուր փոքր գնում նույնպես գումար է։ Զսպեք Ձեր ցանկությունը՝ գնելու այնպիսի իրեր, որոնց կարիքը Դուք իրականում չունեք, և գնումներն արեք՝ ըստ բյուջեով նախատեսածի։

Մեծ գնման համար խնայելը կարող է անհաղթահարելի թվալ, բայց ոչ միշտ։ Եթե Դուք դնեք իրատեսական նպատակ, հետևեք ծախսերին, կազմեք բյուջե և փնտրեք եկամուտը մեծացնելու ուղիներ, Դուք կարող եք հասնել Ձեր նպատակին և գնել Ձեր սրտի ուզածը։ Հաջողություն ենք մաղթում։ 

ՈՒՇԱԴՐՈՒԹՅՈՒՆ Ֆինանսական գրագիտության գործիքով տրամադրված տեղեկությունը կրում է միայն տեղեկատվական նպատակ։ Օգտատերը միշտ պետք է անցկացնի սեփական հետազոտություն և խորհրդակցի մասնագետի հետ՝ համոզվելու համար, որ գործիքի միջոցով ստացված խորհուրդները կիրառելի են իր կարգավիճակի համար։ Մենք չենք երաշխավորում այս կայքում ներկայացված կամ կայքի միջոցով տարածված որևէ խորհրդի, կարծիքի, հայտարարության կամ այլ տեղեկության լրիվ ճշգրտությունը, ամբողջականությունը և վստահելիությունը, ուստի տրամադրված տեղեկության վրա հիմնվելիս գործեք բացառապես սեփական ռիսկով։